عندليب النغم
إبراهيم خليل إبراهيم
( عضو اتحاد الكتاب )
ضاع النغم مـن الوتر
والوش نال مني
والفن حاله اتعوج
وانا لسه مستني
تعالى عيد فننا
يا عندليب غنى
يا مسك أهل النغم
يا كف متحنى
هاجرت طيور الهوى
ما اعرفشى راحت فين ؟
كل الأصيل اغترب
وتاهت العناوين
يا عندليب النغم
شوف الطرب مالُهْ
دا حاله أصبح عدم
تعالى شوف حاله
صار النغم درَبُكهْ
فى كل أحوالُه
الكل غاوى غُنا
فرحان بمواله
يا عندليب النغم
فن السمع مظلوم
والعين فـى عصر الصور
زادت همومها هموم
يا عندليب النغم
سيرتك خلود فـى خلود
فنك برغم السفر
فوق الجميع موجود
والغصن مهما دبل
يفضل عبيره يجود
والتوبة فيها الشفا
زى الهوى وموعود
الفن فين يا حُلم ..؟
عمر اللى راح مايعود ؟