قصيدة للشاعرة مريم توفيق الحسن” الحب”
هي:برمت عليك ما لقيتك ..دخلك دلني على بيتك ..وأن كنك ناوي التعذيب ..والله بخربلك بيتك ؟
هو: قلبي مش ناوي التعذيب ..ولا بقلبك ناوي التدريب ..وأن فكرتي تدمري بيتي ..منك مقبول التخريب ؟
هي: ما عندي الجرأة دمرك ..ولا بفكر ألا بأمرك ..لكن بخاف من الصدمة ..تتركني وتمشي بدربك ؟
هو: أنا عن دربك ما بحيد ..ولو دمرو برجع وبشيد ..قلبي من دونك حزين ..وبوجودك أيامي عيد؟
هي: قلبي فرحان النية ..وبجدد حبك يومية ..صدق إني ما حبيت ..غير حبك يا عينية؟
هو : قلبي مصدق حلفانك ..وعارف اسرار افكارك .. لو ما حكيتي يا حبي ..عيونك رح تحكي بدالك ؟
هي : فرحت الروح المهمومة ..وكلماتي عندك مفهومة ..بشكر قلبك الواعي ..الفاهم حروفي المكتومة ؟
هو: إن ما فهمتك يا قلبي ..كيف رح يتعظم حبي ..عقلي بيفهم عالطاير.. إن كنتي بعيدة او جنبي؟
هي: قلبي بحبك بعتز ..وبالعواصف ما بيهتز ..اللي عندا متلك حبيب ..بيخلد مع شجرات الأرز ؟
هو: يا احلى حبيبة بالكون ..بحسنك صاير بدي عون ..ولو غيرك فرشولي زهور ..بدي ابقى حدك هون ؟
هي: انشالله تبقى وببقالك ..وبدي حقق آمالك ..ونبعد عن كل الحساد ..تاريح بالي وبالك ؟
هو: بدك تبقيلي عا طول ..وبدنا نردد ونقول ..حبينا والتقينا ..وحبنا بهل دنى بيجول …؟؟