الدكتورة سحر وهدان في حوار مع التآخي: الإعلام رسالة إنسانية.. والنجاح الحقيقي أن نترك أثراً طيباً في حياة الناس
حوار: جاسم حيدر/ القاهرة
في إطار اهتمام جريدة التآخي بمتابعة التجارب الإعلامية والثقافية العربية، وتسليط الضوء على الشخصيات التي تركت بصماتها في مجالات الصحافة والإعلام والتربية والعمل المجتمعي، أجرت الجريدة حواراً صحفياً مع الدكتورة سحر وهدان، الإعلامية والصحفية المصرية، للوقوف عند أبرز محطات مسيرتها المهنية، والتعرف على تجربتها التي تجمع بين الرسالة الإعلامية والخبرة التربوية والنشاط الإنساني والمجتمعي.
وتُعدّ الدكتورة سحر وهدان من الشخصيات التي تنوعت تجاربها بين الإعلام والتربية والتعليم وحقوق الإنسان والعمل السياسي والدبلوماسية المجتمعية، إذ حصلت على درجة الدكتوراه في طرق التدريس، إلى جانب دكتوراه فخرية في مجال تطوير الإعلام، وتعمل موجهة في التربية والتعليم، فضلاً عن حضورها الإعلامي من خلال تقديم برنامجي «فكرة صح» و«صوت المواطن»، اللذين تتناول عبرهما قضايا المجتمع وهموم المواطن.
وشغلت وهدان عدداً من المناصب والمهام في مؤسسات حزبية وإعلامية ومجتمعية، من بينها مدير المكتب التنفيذي والأمين العام المساعد لعموم الجمهورية بحزب مصر القومي سابقاً، ومساعد رئيس حزب مصر 2000 للعلاقات العامة حالياً، ونائب رئيس الهيئة العليا للقبائل العربية والعائلات المصرية للعلاقات العامة على مستوى الجمهورية، كما حصلت على لقب سفيرة النوايا الحسنة.
وفي المجال الإعلامي، تولت مسؤوليات متعددة، من بينها إدارة مكتب القاهرة بشبكة وموقع «آخر خبر»، وإدارة المكتب الإعلامي للموقع والشبكة والقناة في محافظة القاهرة، إلى جانب عملها مديراً للمكتب الإعلامي بأكاديمية الشروق للمحبة والسلام، ومشاركتها في أنشطة مؤسسات وجمعيات ثقافية وإعلامية، من بينها جمعية محبي فريد الأطرش وجروب ربيع العمر للطرب الأصيل.
كما تتولى مهام أمين عام الإعلام بالمنظمة الدولية لحقوق الإنسان، وتعمل مستشارة إعلامية لدى عدد من المؤسسات والجهات، من بينها البورد الأمريكي في الوطن العربي، فضلاً عن نشاطها في مجالات العلاقات العامة والعمل المجتمعي.
وعلى صعيد التأهيل والتطوير المهني، حصلت على مجموعة من الدورات التدريبية في أكاديمية ناصر العسكرية، فضلاً عن شهادة شرفية عليا من برنامج «مع المحاور وفرسان الكاميرا».
وخلال هذا الحوار الذي أجرته “جريدة التآخي” معها في القاهرة، نتوقف عند أبرز محطات تجربتها الإعلامية والتربوية، ونتعرف على رؤيتها لدور الإعلام في خدمة المجتمع، وأهمية تطوير الخطاب الإعلامي ومواكبة التحولات المتسارعة في المشهد الإعلامي، فضلاً عن علاقتها بالعمل الثقافي والإنساني، وطموحاتها ومشروعاتها المستقبلية.

المحور الأول: البدايات والمسيرة الإعلامية
س1: كيف تقدمين نفسك للقارئ بعيداً عن الألقاب والمناصب؟
– أنا سحر وهدان، إنسانة بسيطة، بنت مصرية أصيلة. بعيداً عن أي لقب، أنا ست بتحب الناس، وبتحب بلدها، وبتؤمن إن الكلمة ممكن تغير حياة. أنا في الأصل أعمل في التربية والتعليم، وده اللي علمني أكون قريبة من الناس، وأسمعهم بقلبي قبل أذني.
س2: متى بدأت رحلتك مع الإعلام؟ وهل كان دخولك هذا المجال حلماً منذ الطفولة؟
– بدأت رحلتي مع الإعلام سنة 2018. كانت بدايتي في برنامج اسمه “كلنا مسئول”، وده كان أول باب اتفتح ليا. ومن ساعتها حسيت إن ده مكاني، وإن ده الحلم اللي كنت بدور عليه طول حياتي، حلم الطفولة اللي اتحقق متأخر بس اتحقق بصدق.
س3: من الشخصية التي كان لها التأثير الأكبر في تكوينك الإعلامي؟
– أكتر حد أثر فيا في حياتي كلها هما والدي ووالدتي، ربنا يرحمهم. للأسف هما توفوا قبل ما أدخل مجال الإعلام، لكن هما اللي زرعوا فيا الثقة والقوة وحب الناس. أما في المجال نفسه، فأنا متأثرة جداً بالإعلامية ريهام سعيد، بحبها أوي ومتأثرة بيها جداً. ومتأثرة كمان بالإعلامية ريهام عياد، لأنها بتعمل برنامج بسيط، بس أدائها بيعجبني جداً، بسيطة وبتوصل للقلب.

س4: ما أبرز المحطات التي شكلت نقطة تحول في مسيرتك الإعلامية؟
– بدأت ببرنامج “كلنا مسئول”، وبعد كده تدرجت واشتغلت في موقع وشبكة آخر خبر. وبعد كده اشتغلت في برامج مهمة زي برنامج “فكرة صح” وبرنامج “صوت المواطن”. كل محطة من دول كانت نقطة تحول، وكانت بتعلمني حاجة جديدة، وبتخليني أقوى وأقرب للناس أكتر.
س5: كيف تصفين تجربتك أمام الكاميرا، وما الذي يميز أسلوبك في تقديم البرامج؟
– الحمد لله، أول مرة وقفت فيها قدام الكاميرا كان عندي ثقة عالية جداً في نفسي. وده لأن أنا متعودة أواجه الجمهور، أنا أصلاً بشتغل في التربية والتعليم، وكنت ماسكة مدير مكتب المدير التنفيذي ومساعد أمين عام الجمهورية في حزب كبير، حزب أسسه طلعت السادات. فمواجهة الجمهور والوقوف قدام الناس عمرها ما كانت صعبة عليا. واللي بيميز أسلوبي إني بتكلم ببساطة، من القلب للقلب، من غير تكلف ولا تصنع.
س6: هل واجهتِ صعوبات أو تحديات في بداياتك المهنية؟ وكيف استطعتِ تجاوزها؟
– أيوة، طبعاً واجهت. أصعب موقف قابلني في بدايتي، إني حسيت إن الإعداد والشغل ماكانش عاجبني، وماكانش على المستوى اللي يليق بيا وباللي أنا عايزة أقدمه. وده ضايقني جداً، لأني بحب أقدم حاجة تليق بالناس. فتجاوزت ده بإني قررت أغير وأقفز لحاجة أعلى، وأشتغل على نفسي أكتر، وأدور على المكان اللي يقدرني ويقدر شغلي.
س7: ما اللقاء الإعلامي الذي ترك بصمة خاصة في ذاكرتك؟
– عندي لقاءات كتير مش قادرة أنساها. منهم لقاء عملته مع الفنان أركان فؤاد، كان لقاء بسيط وصغير، بس مش قادرة أنساه أبداً. وفي لقاء تاني مع مذيعة صاحبتي، كانت بتسألني عن فيلم “أصحاب ولا أعز” بتاع الفنانة منى زكي، قلت فيه حوار مدته دقيقتين، كان تحفة جداً وكان جميل. ده غير لقاءاتي مع شخصيات كبيرة جداً، سفراء ونواب مجلس الشعب وناس حلوة جداً. الحمد لله، كل لقاء علمني حاجة وساب جوايا بصمة.

المحور الثاني: التنمية البشرية وتطوير الذات
س8: كيف انتقلتِ من العمل الإعلامي إلى الاهتمام بمجال التنمية البشرية؟
– أنا ما انتقلتش، أنا جمعت بينهم. الإعلام والتنمية البشرية عندي وجهين لعملة واحدة، الاتنين هدفهم الإنسان. وأنا من شغلي في التربية والتعليم، ومن شغلي في الإعلام، كنت كل يوم بقابل ناس موجوعة، ناس محبطة، ناس عندها قدرات ومش عارفة تطلعها.فبدأت أحس إن دوري مش بس إني أقدم برنامج، دوري إني أساعد الناس تطور من نفسها، وتصدق في نفسها، وتقوم من تاني. فالتنمية البشرية جت لوحدها، من حبي للناس.
س9: ما مفهوم التنمية البشرية من وجهة نظرك، وما مدى حاجة الإنسان العربي إليها اليوم؟
– التنمية البشرية من وجهة نظري، هي إن الإنسان يعرف نفسه الأول. يعرف هو مين، وعايز إيه، وإيه نقط قوته ونقط ضعفه، ويشتغل على نفسه. الإنسان العربي النهاردة محتاجها جداً، لأن الضغوط بقت كتيرة، الحياة بقت سريعة، والناس بقت تعبانة نفسياً. محتاجين حد يفكرنا إننا نقدر، وإننا نستاهل نعيش حياة أحسن.
س10: هل التنمية البشرية علم قائم على أسس علمية أم أنها تعتمد بدرجة كبيرة على التجارب والخبرات الشخصية؟
– هي الاتنين مع بعض. فيها أسس علمية، ودراسات، وعلم نفس، وعلم اجتماع. وفي نفس الوقت، التجارب الشخصية هي اللي بتخلي الكلام يوصل. أنا لما بتكلم عن الإحباط والفشل، بتكلم من تجربة حقيقية، مش من كتاب. الكتاب بيديني العلم، والتجربة بتديني الصدق، والصدق هو اللي بيوصل للقلب.
س 11: ما أهم المهارات التي يحتاجها الإنسان لتحقيق النجاح في حياته الشخصية والمهنية؟
– أهم مهارة هي الثقة بالنفس. وبعدها تيجي مهارة التواصل، إنك تعرف تتكلم وتسمع. ومهارة إدارة الوقت، ومهارة إنك تعرف تتحكم في مشاعرك. والأهم من كل ده، مهارة إنك تفضل مكمل رغم كل حاجة. النجاح مش للي أشطر واحد، النجاح للي نفسه أطول.
س12: كيف يمكن للإنسان أن يكتشف قدراته ومواهبه ويحولها إلى إنجازات حقيقية؟
– أول خطوة إنه يصدق إنه عنده موهبة، لأن كل إنسان ربنا خلقه عنده حاجة مميزة. تاني خطوة، يجرب. يجرب حاجات كتير، لحد ما يلاقي نفسه في حاجة بيحبها. تالت خطوة، يشتغل على نفسه ويتعلم. ورابع خطوة، ما يستناش الفرصة تيجي، هو اللي يصنع الفرصة. أنا بدأت 2018، وماكنتش مستنية حد يديني فرصة، أنا اللي دورت عليها وصنعتها.
س13: ما رسالتك إلى الأشخاص الذين يعانون من الإحباط وفقدان الثقة بالنفس؟
– رسالتي ليهم: أوعى تصدق إنك فاشل. الإحباط ده مرحلة، مش نهاية.
كلنا عدينا بيها، وأنا شخصياً عديت بيها. خد وقتك، ازعل شوية، وبعدين قوم، وامسح دموعك، وكمل. انت أقوى مما تتخيل، وربنا عمره ما بيحط حد في اختبار أكبر من قدرته.ابدأ بخطوة صغيرة النهاردة، وبكرة هتلاقي نفسك في حتة تانية خ الص.
س14: كيف يمكن مواجهة الفشل وتحويله إلى نقطة انطلاق نحو النجاح؟
– الفشل مش عكس النجاح، الفشل جزء من النجاح. أنا لما حسيت في بدايتي إن الشغل مش على المستوى اللي يليق بيا، ما اعتبرتوش فشل، اعتبرته إشارة إني لازم أروح لمكان أحسن. اسأل نفسك: أنا اتعلمت إيه من اللي حصل؟ واعمل بيه. اللي بيقع وبيفضل قاعد، هو ده اللي فشل بجد. لكن اللي بيقع وبيقوم، ده هو اللي هينجح.
س 15: هل تعتقدين أن ثقافة تطوير الذات أصبحت ضرورة في ظل التحديات الاجتماعية والاقتصادية المعاصرة؟
– طبعاً، بقت ضرورة مش رفاهية. الدنيا بتتغير كل يوم، واللي مش بيطور من نفسه هيتأخر. في ظل الغلاء والضغوط والمشاكل، الإنسان محتاج يطور من تفكيره، ومن شغله، ومن علاقته بنفسه وبالناس. تطوير الذات هو السلاح اللي هنواجه بيه الحياة، وهو اللي هيخلينا نعيش بكرامة وأمل.

المحور الثالث: المرأة والإعلام والمجتمع
س16: كيف تنظرين إلى حضور المرأة المصرية والعربية في المشهد الإعلامي؟
– أنا شايفة إن المرأة المصرية والعربية أثبتت نفسها بقوة في المشهد الإعلامي. بقينا نشوف مذيعات وصحفيات ومعدات ومخرجات شاطرين جداً، وبيقدموا محتوى محترم ومؤثر. المرأة المصرية بالذات، ست قوية وذكية، وعندها قدرة إنها توصل لقلب المشاهد بصدقها. أنا فخورة جداً باللي وصلت له المرأة في الإعلام، ولسه اللي جاي أحسن.
س17: هل استطاعت المرأة العربية أن تحقق المكانة التي تستحقها في المؤسسات الإعلامية؟
– وصلت لمكانة كبيرة، بس لسه ما وصلتش للمكانة اللي تستحقها بالكامل.
لسه في مؤسسات بتبص للمرأة إنها وجه جميل بس، مش عقل وفكر ورؤية.
لكن أنا مؤمنة إن المرأة بإصرارها وشغلها بتفرض نفسها، وبتوصل. أنا بدأت في 2018، وكنت بشتغل وأنا عارفة إن الطريق مش سهل، لكن بالصبر والشغل قدرت أثبت نفسي.
س18: ما أبرز التحديات التي تواجه المرأة العاملة في المجال الإعلامي؟
– أكبر تحدي هو إنها لازم تثبت نفسها مرتين. مرة إنها شاطرة، ومرة إنها تقدر تتحمل ضغط الشغل. وتحدي تاني، إن في ناس بتحكم عليها من شكلها، مش من شغلها. وتحدي ثالث، إنها ساعات بتلاقي الإعداد أو الإمكانيات مش على المستوى اللي يليق بيها، وده اللي حصل معايا في بدايتي وضايقني جداً.
لكن الست اللي عندها حلم، مفيش تحدي بيوقفها.
س 19: كيف يمكن للمرأة أن تحقق التوازن بين مسؤولياتها الأسرية وطموحاتها المهنية؟
– التوازن مش معناه إنك تكوني كاملة في كل حاجة في نفس الوقت، التوازن معناه إنك ترتبي أولوياتك. أنا دايماً بقول للست: بيتك مهم، وشغلك مهم، ونفسك أهم. لازم تنظمى وقتك، وتطلبي المساعدة لما تحتاجيها، وما تحسيش بالذنب لو قصرتي شوية هنا أو هنا. الست الناجحة مش هي اللي ما بتتعبش، الست الناجحة هي اللي بتعرف تقوم تاني وتكمل. وأهم حاجة، إنها تفضل فاكرة إن نجاحها في شغلها هيخلي ولادها فخورين بيها.
س20: ما الدور الذي ينبغي أن يؤديه الإعلام في تعزيز ثقافة الوعي المجتمعي؟
– الإعلام دوره خطير جداً. الإعلام هو اللي بيبني الوعي، أو بيهده. المفروض الإعلام يكون مدرسة، يعلم الناس، ويوعيهم، ويقدم لهم المعلومة الصح، ويفتح لهم باب أمل. أنا لما قدمت برنامج “صوت المواطن” وبرنامج “فكرة صح” وبرنامج “كلنا مسئول”، كان هدفي إن صوت الناس يوصل، وإن الناس تفهم حقوقها وواجباتها. الإعلام مش ترفيه بس، الإعلام رسالة.
س21: كيف يمكن توظيف الإعلام في مواجهة الشائعات والأفكار السلبية؟
– بالصدق والسرعة. الشائعة بتنتشر لما الناس تلاقي فراغ. لو الإعلام قدم الحقيقة بسرعة وببساطة، الشائعة هتموت لوحدها. ولازم نعلم الناس إنها ما تصدقش أي حاجة بتتقال، وتتأكد الأول. ولازم نقدم محتوى إيجابي، يخلي الناس تحب بلدها، وتحب بعضها، وتفكر في بكرة أحسن. أنا ضد الإعلام اللي بيخوف الناس، أنا مع الإعلام اللي بيطمن الناس وبيوعيها.

المحور الرابع: الإعلام العربي والعلاقات الثقافية
س22: كيف تقيمين واقع الإعلام العربي في ظل انتشار الإعلام الرقمي ومنصات التواصل الاجتماعي؟
– الإعلام العربي دلوقتي في مرحلة تحول كبيرة. زمان كان الإعلام هو التليفزيون والراديو والجريدة، دلوقتي كل واحد معاه موبايل بقى إعلامي. ده فيه ميزة وفيه خطر. الميزة إن صوت الناس بقى بيوصل أسرع، والخطر إن المعلومة بقت ممكن تكون غلط وتنتشر بسرعة. أنا شايفة إن الإعلام العربي لازم يواكب التطور، بس من غير ما يفقد هويته واحترامه.
س23: هل أثرت مواقع التواصل الاجتماعي سلباً أم إيجاباً في مهنية الإعلام؟
– أثرت بالاتنين. إيجاباً، لأنها قربت الإعلامي من الناس، وخلته يعرف رأي الجمهور في لحظتها، وخلت أي حد موهوب يقدر يظهر. وسلباً، لأنها خلت ناس كتير تقدم محتوى من غير مهنية، ومن غير مصداقية، بس عشان الترند والمشاهدات. المهنية الحقيقية هي إنك تحترم عقول الناس، حتى لو الترند ضدك.
س24: ما مسؤولية الإعلامي في تقديم محتوى هادف يحترم عقل المشاهد؟
– مسؤولية كبيرة جداً. الإعلامي مش بيقدم لنفسه، بيقدم لملايين. لازم يتأكد من المعلومة قبل ما يقولها، ولازم يقدم محتوى يفيد الناس، مش يخوفهم أو يضللهم. أنا طول حياتي، من أول برنامج “كلنا مسئول” لحد “صوت المواطن” و “فكرة صح”، كنت حريصة إني أقدم حاجة محترمة، تليق بالناس اللي بتتفرج عليا. احترام عقل المشاهد هو اللي بيخلي الإعلامي يعيش في قلوب الناس.

س25: كيف يمكن تعزيز التعاون الإعلامي والثقافي بين مصر والعراق؟
– مصر والعراق بلدين ليهم تاريخ عظيم، وبيجمعهم حب وفن وثقافة. ممكن نعزز التعاون ده ببرامج مشتركة، ولقاءات إعلامية مشتركة، وتبادل للخبرات بين الإعلاميين. وممكن نعمل حوارات مع فنانين ومثقفين من البلدين، ونعرف الناس على تراث بعض. أنا بشوف إن الإعلام هو أسرع طريق عشان نقرب الشعوب من بعض، ومصر والعراق يستاهلوا إنهم يكونوا قريبين أكتر.
س26: هل تعتقدين أن الإعلام قادر على بناء جسور التواصل والمحبة بين الشعوب العربية؟
– أيوة، طبعاً، وأنا مؤمنة بده جداً. الإعلام لو استُخدم صح، يقدر يبني محبة بدل الكراهية، ويبني جسور بدل الحواجز. لما نقدم قصة نجاح من العراق، أو أغنية من مصر، أو عادة جميلة من أي بلد عربي، الناس بتحس إننا واحد. إحنا كلنا بنتكلم نفس اللغة، وبنحلم نفس الأحلام، والإعلام هو اللي يقدر يفكرنا بده.
س27: ما رأيك في أهمية توثيق التراث الثقافي والفني من خلال البرامج والحوارات الاعلامية؟
– ده واجب علينا، مش اختيار. تراثنا الثقافي والفني هو هويتنا، ولو ضاع، هنضيع معاه.لما بنعمل حفلة في مكان عريق زي قبة الغوري، ولما بنستضيف فنان زي أركان فؤاد، إحنا بنوثق فن جميل، وبنفكر الأجيال الجديدة إن عندنا فن أصيل. البرامج والحوارات الإعلامية لازم تحافظ على التراث، وتقدمه للشباب بشكل بسيط وجميل، عشان يحبوه ويكملوا بيه

المحور الخامس: الطموحات والرسائل الإنسانية
س28: ما المشروع أو الحلم الذي تطمحين إلى تحقيقه خلال المرحلة المقبلة؟
– حلمي في المرحلة اللي جاية، إني أقدم مشروع إعلامي إنساني كبير، يوصل لكل بيت. مشروع يكون هدفه إننا نساعد الناس، ونوعيهم، ونديهم أمل.نفسي أعمل برنامج يجمع الناس، ويسمع صوتهم، ويحل مشاكلهم بجد.
ونفسي أقدم حفلات ومبادرات ثقافية في أماكن عريقة زي قبة الغوري، عشان نرجع الفن الجميل والطرب الأصيل للناس تاني.
س29: هل تفكرين في تقديم برنامج إعلامي متخصص يجمع بين الإعلام والتنمية البشرية؟
– أيوة، طبعاً، وده هو حلمي الحقيقي. نفسي أقدم برنامج يجمع بين الإعلام والتنمية البشرية، برنامج يتكلم عن الإنسان، عن مشاكله، عن أحلامه، عن إزاي يطور من نفسه. برنامج بسيط، من القلب للقلب، يخلي اللي بيتفرج يحس إن الكلام ده ليه هو. أنا مؤمنة إن ده هو الإعلام اللي الناس محتاجاه دلوقتي.

س30: ما الشخصية التي تتمنين إجراء حوار إعلامي معها؟
– أنا عملت لقاءات مع شخصيات كبيرة، سفراء ونواب مجلس الشعب، وفنانين زي الفنان أركان فؤاد. لكن لو هتمنى شخصية، هتمنى أعمل حوار مع كل ست مصرية وعربية ناجحة وكافحت في حياتها. الست اللي ربت ولادها لوحدها، والست اللي بدأت من الصفر ونجحت، دول هما الأبطال الحقيقيين اللي نفسي الناس تسمع قصصهم.
س31 ما الإنجاز الذي تعتزين به أكثر من غيره في مسيرتك؟
– أكتر إنجاز بعتز بيه، إني قدرت أثبت نفسي، وأنا بدأت من الصفر سنة 2018. من “كلنا مسئول” لـ “آخر خبر” لـ “فكرة صح” و “صوت المواطن”، كل خطوة كانت إنجاز. لكن الإنجاز الحقيقي، هو حب الناس وثقتهم فيا. لما حد يقابلني في الشارع ويقولي: انتي كلامك فرق معايا، دي عندي بالدنيا كلها.
س32: ماذا تعني لك الشهرة، وهل تمثل النجاح الحقيقي للإنسان؟
– الشهرة عندي مش هدف، الشهرة مسؤولية. الشهرة لوحدها مش نجاح، النجاح الحقيقي إنك تكون مؤثر، وإنك تكون سايب أثر حلو في حياة الناس. في ناس مشهورة بس مش ناجحة، وفي ناس مش مشهورة بس ناجحة جداً.
أنا مش بدور على الشهرة، أنا بدور على إن كلامي يوصل، ويسيب بصمة حلوة.
س33: ما الحكمة التي تؤمنين بها وتسيرين على نهجها في حياتك؟
– الحكمة اللي ماشية بيها طول حياتي هي: “اللي عنده حلم حقيقي، مفيش حاجة توقفه.” وبرضه مؤمنة إن: “اتكلم من قلبك، توصل للقلب على طول.”
أنا ماشية بالحكمتين دول، في شغلي وفي حياتي، وهما اللي وصلوني للي أنا فيه.
س34: ماذا تقولين للشباب العربي الذين يمتلكون الطموح لكنهم لا يعرفون من أين يبدأون؟
– بقولهم: ابدأوا من مكانكم، ومن اللي في إيديكم. ما تستنوش الظروف تبقى مثالية، لأنها عمرها ما هتبقى مثالية. ابدأ بخطوة صغيرة النهاردة، اتعلم، جرب، اغلط، وقوم تاني. أنا بدأت 2018، وماكانش معايا حاجة غير حلمي وثقتي في ربنا وفي نفسي. انت تقدر، بس صدق في نفسك الأول.

س35: ما رسالتك الأخيرة إلى جمهورك ومحبيك في مصر والعراق والوطن العربي؟
– رسالتي ليكم: بحبكم من قلبي، وشكراً على حبكم وثقتكم فيا. شكراً لجمهوري في مصر، وشكراً لجمهوري في العراق، وشكراً لكل حد في الوطن العربي بيتابعني وبيصدقني. أنا بيكم وليكم، ومن غيركم ماكنتش هكون هنا. أتمنى نفضل دايماً قريبين من بعض، بالمحبة والصدق والأمل. أنا سحر وهدان، وبقولكم: اللي جاي أحلى إن شاء الله، طول ما احنا مع بعض. أسئلة ختامية ذات طابع إنساني وإعلامي
س36: لو عاد بك الزمن إلى بداية مشوارك، ما النصيحة التي تقدمينها لنفسك؟
– لو رجع بيا الزمن لسنة 2018، هقول لنفسي: ما تخافيش، كملي، انتي صح. هقولها: ما تزعليش من أي حد أحبطك، وما توقفيش عشان الإعداد مش عاجبك، ولا عشان حد قالك مش هتقدري. هقولها: انتي أقوى مما تتخيلي، واللي جاي أحلى بكتير من اللي فات. وهقولها: صدقي في نفسك من أول يوم، زي ما صدقتي بعدين.
س37: هل هناك موقف إنساني أثر في حياتك وغير نظرتك إلى الأشياء؟
– أيوة، في موقف عمري ما هنساه. وفاة والدي ووالدتي، ربنا يرحمهم، غيرت نظرتي لكل حاجة. خلتني أعرف إن الدنيا قصيرة، وإن اللي بيفضل هو السيرة الطيبة والعمل الصالح. من ساعتها وأنا قررت إن حياتي تكون رسالة، وإن شغلي يكون عشان الناس، وإن أي حاجة أعملها تكون لوجه الله وللناس. هما اللي علموني…
وفي ختام هذا الحوار، نتقدم بخالص الشكر والتقدير إلى الإعلامية المصرية القديرة الدكتورة سحر وهدان، على رحابة صدرها وتفاعلها الجميل، وما أتاحته لنا من فرصة لإجراء هذا اللقاء. من جانبها، أعربت الدكتورة سحر وهدان عن شكرها وامتنانها لأسرة جريدة “التآخي” لهذا الحوار، ووصفت اللقاء باللطيف والمميز، كما وجّهت تحياتها ومودتها إلى الشعب العراقي بكل أطيافه، متمنيةً له دوام الخير والاستقرار.